World Economic Forum meeting cover turin YouTuber 6 thlang
Davos, Switzerland-a World Economic Forum annual meeting cover turin YouTuber paruk thlan an ni. Heng mite hi meeting neihnaah hian telin, a chhung aṭangin an lo cover vek dawn a ni.
Kumtinin Davos-ah hian World Economic Forum annual meeting nei tur hian ram hrang hrang hruaitu, sumdawng lian, CEO, social activist, celebrity leh economist-te an kalkhawm ṭhin. Kumina meeting neihah hian ram hruaitu 52 bakah CEO 600 dawn an tel.
WEF annual meeting-ah hian an thil rel leh sawihote chu zau zawka thehdarh a nih theihna atan YouTuber-te bakah digital creator ṭhenkhat pawh sawm an ni. Kumin meeting hi social media creator-te an tel tam ber ṭum a ni.
YouTuber star paruk an sawmte hmang hian, Davos 2023 hi thlirtu maktaduai 230 chuang a neih beisei a ni. Nikum meeting-ah hian YouTuber hi pahnih an sawm a ni. Kumina YouTuber an sawmte hi Adanna Steinacker, Luis Villar, Prajakta Koli, Wodemaya, Nathalia Arcuri bakah Indian YouTuber star Prajakta Koli-te an ni.
WEF annual meeting hi January 16 aṭang khan neih ṭan a ni a, January 20 thleng a awh ang. World Economic Forum hi kum 1071-a German economist Klaus Schwab-a din a ni a, a tirah chuan European Management Forum tih a ni a, kum 1987-ah a hming hi thlak a ni. Kumin meeting thupui atan hian “Cooperation in a Fragmented World” tih an hmang.