Ram 50-in Palestinian a hrekna hlip turin Israel an ngen

Israel-in Palestinian Authority a hrekna chu tun thla chhung ngeia hlip turin Thawhṭanni khan United Nations hnuaia ram 50-te an ngen.

Nikum December 30 khan UN General Assembly chuan Israel-in Palestinian ram a luahsak chungchangah, International Court of Justice chu a ngaihdan sawi tura ngenin resolution a lo pass tawh bawk a ni. Mahse hemi chhan letna atan hian Israel chuan January 6 khan Palestinian Authority hrekna eng emaw zat siam belhin, heng zingah hian sum lama hrekna pawh a tel. Israel chuan hei hi resolution siam tura Palestinian lamin an nawrna man tih a sawi.

UN hnuaia member ram 50-te chuan Thawhṭanni khan thuchhuah siamin, ICJ leh international law chu an thlawp zel dawn tih an sawi. General Assembly-in court hnena ngenna a siam avanga Israel sorkarin Palestinian mipui, hruaitu leh civil society tana hrekna na tak a siam chu ṭha lo an tih thu an tarlang.