Ukraine-a helicopter tlaah mi 16 an thi Thi zingah Interior Minister a tel
Ukraine khawpui, Kyiv khaw daiah nimin khan helicopter a tla a, mi 16 an thi a, mi 15 an hliam. Thi zingah hian interior minister Denys Monastyrsky bakah a ministry-a senior official-te an tel.
National police hotu Ihor Klymenko chuan Ukraine state emergency service helicopter hi Kyiv khawchhak lama khaw dai, Brovary-a nursery leh residential building bulah tlain a kang zui tih a sawi. Helicopter tlak lai hian nursery-ah hian naupang leh staff eng emaw zat an awm a, naupang pahnih thiin hliam tuar eng emaw zat an awm bawk.
Ukraine official-te chuan helicopter chetsual chhan hi an sawi lo a, Ukraine ram run mektu Russia lam pawhin engmah an la sawichhuak lo.
Helicopter chesuala thi, interior minister Denys Monastyrsky hi kum 42 mi niin, fa pahnih a nei a, kum 2021 khan minister atan hian ruat a ni. President Zelenskyy-a cabinet member pawimawh tak niin, Russia-in an ram a run hnuah Russia sipaite beihna avanga chhiatna thlen dan leh Ukraine mi thi awm zatte an ram mipuite hriat turin a tarlang fo ṭhin. Helicopter hian Russia leh Ukraine sipaite indo mekna hmun pan an tum nia sawi a ni bawk.
Helicopter chesuala thi zingah hian first deputy minister Yevhen Yenin leh state secretary Yurii Lubkovich te pawh an tel. Heng mi pawimawh tak takte hi indona an hmachhawn mekah Ukraine chakna tura theihtawp chhuahtute an nih thu interior ministry adviser Anton Herashchenko chuan a sawi.