Khawvela upa ber Lucile Randon a thi

Khawvela mihring upa ber, French nun Lucile Randon chu kum 118 mi niin Toulon-a nursing home-ah Thawhlehni khan a thi.

Sister Andre tia hriat, Randon hi kum 1904, February 11 khan France chhim lamah a piang. Kum 2022, April thlaa Kane Tanaka (Japan) a thih hnuah Guiness World Records chuan khawvela mihring dam lai upa berah a nemnghet a ni.

Indopui II hunlai khan Sister Andre hian naupangte a enkawl ṭhin a, indo a zawh hnuah Vichy, Auvergne-Rhone-Alpes region hospital-a thawkin fahrah leh tarte a enkawl ṭhin. Catholic nun atana a inpek hnuah a hun pum rawng­bawlnan a hmang a, nun zinga upa ber record a nei bawk. Kum 2019 khan a hnathawhna, Provence-Alpes-Cote d'Azur region-a Toulon chuan honorary citizen-ah a lo puang tawh bawk.

Kum 2021 January 16 khan Sister Andre hian Covid-19 hri kaiin hun eng emaw chen a inkhunghran hnuah enkawl dam a ni. A kum upat hnuah hian a mit a del a, wheelchair nen a awm zui bawk a, mahse hetichung hian amah aia naupang zawkte enkawl hna pawh a la thawk reng a ni.