Brazil President tharin President chenna vengtu sipai 40 a ban

Brazil president thar, Luiz Inacio Lula da Silva chuan January 8-a President hlui Jair Bolsonaro thlawptuten an ram khawpui, Bra­silia-a sorkar building pawimawhte luhchilh an suasam hnuah, Presi­dential residence vengtu sipai 40-te chu a ban.

Presidential resi­dence, Alvorado palace vengtute hi Navy, Air Force leh police force amite an ni.

Lula hi buaina chawkchhuak tute'n sorkar building pawi­mawhte luhkhunga an suasam chu an dan loh avangin sipaite chungah pawh a lawm lo hle nia sawi a ni. A hmaa media mite a kawmnaah pawh Lula chuan nawrh huaihawtten sorkar building an luhkhung ṭum hian kawngkhar tihchhiaht pawh hmuh a ni lo a, hei vang hian lo thurualpuia an luh lo phalsak an awm ngei nia a lan thu a sawi. President Office chuan vengtu atan hian tute nge a dah dawn tih erawh sawilan a la ni lo.

Brasilia khawpuia nawrh huaihawtuten sorkar building pawimawhte an beih chungchang hi chhuizui mek a ni a, he thil thlengah hian security lamah thil felhlel a awm tih an lo sawi tawh a ni. Bolsonaro thlawp­tute hian Congress, Planalto presidential palace leh Supreme Court building-te beiin bungruate pawh an suasam a ni. Nawrh huai­hawt zinga mi eng emaw zat chu man niin, thubuai hrang hrang siamsak an ni bawk.