New Zealand PM Jacinda Ardern a bang dawn

New Zealand prime minister Jacinda Ardern chuan nimin khan New Zealand ram hruaitu a nihna aṭangin a bang dawn tih a puang a, kumin October thlaa an ram inthlanpui neih turah pawh chuh a tum lo tih a sawi bawk.

Napier-a chanchinthar lakhawm­tute a kawmnaah, PM Ardern chuan February 7 hian PM a nih tawpna tur a ni tih a sawi. October 14-a an ram inthanpui neih hma chu a seat erawh a la chelh zui tur thu a sawi.

"Hna hautak leh harsa lutuk avanga chawl tur ka ni lo, chutiang ni se thla hnih liam ta khan ka chawl tawh ang. Ka chawlh chhan chu hetiang mawhphurhna neia ram hruai hna thawh hun leh, chawlh hun te a awm vang a ni. He hna in a ken telte ka hria a, thawk zui zel turin ka chak tawk tawh lo a ni," a ti. Kum nga leh a chanve chhung Prime Minister dinhmun chelh chu a hautak takzet tih sawiin, mihring ve mai a nih avangin a ken a ngai ve ta, niin a sawi.

Kum 42 mi, PM Ardern hi an rama Covid-19 hri leng do letna kawnga a hmalak danah khawvel huap fak a hlawh hle a, thla hnih chhungin hri lengte an thunun thei a ni. Mahse hri leng dona atana a kaihhruai sorkar hmalakna chu a khauh lutuk tia sawisel pawh a tawk ve tho a ni.

Ardern hian nikum December thla khan Covid-19 hri leng dona kawnga sorkar hmalak dan zirchiang tur leh, hri leng a thlen leh palha inbuatsaihna ṭha zawk siam a nih theih dan turte zirchiang turin Royal Commisison of Inquiry a din a, nakumah report hi an thehlut ang.

Pathiannia hian rorellai, Labour Party chuan hruaitu thar an thlang dawn a, hruaitu thar hian inthlanpui neih hma chu Prime Minister dinhmun hi a chelh ang. Hetih lai hian New Zealand deputy prime minister, finance minister ni bawk Grant Robertson pawhin inthlanpui neih hunah chuh a tum tawh loh avangin party hruaitu thar dinhmun hi chuh a tum lo tih a sawi ve bawk.