Mihring damlai zinga upa ber Spain mi Morera

Mihring upa bera puan, French nun Lucile Randon chu kum 118 mi nia Thawhlehnia a thih tak avangin, Guiness World Records chuan Spain mi, kum 115-a upa Maria Branyas Morera-i chu mihring dam lai zinga upa berah a puang dawn.

Guiness World Records chuan Morera hi mihring dam lai zingah upa berah ngaih ni tawh mah se, document-te enfiah a, a chhungte an kawm hnuah official-in a puang chauh ang.

Spain hmarchhak lam, Olot khuaa Santa Maria del Tura nursing home-ah Morrea hi kum 20 chuang a awm tawh. A hrilsena pawh a la ṭha nia sawi a ni. A fanu naupang ber, kum 78 mi Rosa Mort chuan a nu hi hospital luh ngai khawpin a la awm ngai lo a, ruh tliak pawh vawi khat mah nei loin a la hrisel ṭha tih a sawi.

Maria Branyas Morera hi a nu leh pate Mexico aṭanga US an pem luh hnuah kum 1907, March 4 khan a piang a, mahse Indopui I thlenlai, kum 1915 khan Spain-ah an kir leh a ni. Fa pathum, tu 11 leh tuchhuan 11 a nei.