Ukraine President-in Inbiakna neihpuiah China President sawm

Ukraine president Volodymyr Zelenskyy chuan China president Xi Jinping chu inbiakna neihpuiah a sawm.

President Zelenskyy sawmna lehkha hi Davos, Switzerland-a World Economic Forum-a China palai hnenah hlan a ni.

Nikum February thlaa Russia-in Ukraine ram a run hnuah, Zelenskyy hian President Xi hi inbiakna neihpui a lo tum fo tawh a, China hian Russia president Vladimir Putin chu a thunun theih a beisei a ni. Hetih lai hian Russia sipaiten Ukraine an run hnu lawkah, China leh Russia hian ram pahnih thawhdunna chuan bithliah chin a neih loh thu an puang a ni. Zelenskyy chuan an sawmna chu President Xi chuan a rawn chhan ngei a beisei thu a sawi.

Davos-a thu a sawiah, President Zelenskyy chuan kum 2014-a Russia-in an ram a laksak, Crimea bial chu Ukraine chuan laklet leh ngei a tum a, hemi kawnga pui tura ralthuam tam zawk pe turin khawthlang ramte a ngen nghal bawk. "Crimea hi kan ram, kan tuipui leh kan tlang ramte a ni. In ralthuamte min pe ula, kan ram hi kan lalet ngei ang," tiin a ngen.