Myanmar civil President hlui jail-ah dah luh a ni

Myanmar sipai sorkar chuan civil sorkar an paihthlak taka president, U Win Mynt chu thla sarih chhung pawn chhuak thei lo, house arrest-a an hren hnuah Bago region-a Taungoo jail-ah a tantir leh.

National League for Demo­cracy sorkar hnuaia civilian president, U Win Mynt hi kum 2021, February thlaa sipaiten sorkar thuneihna an hnehchhuh hnuah khan house arrest-in an dah nghal a, mahse an hrenna hmun erawh an tarlang lo.

Sipai sorkar hian NLD hotu, Aung San Suu Kyi-i pawh nikum June thla khan house arrest-a an hrenna aṭangin Naypyitaw tan-inah an lo sawn tawh bawk.

Report ṭhenkhatin a tarlan danin, president paihthlak tak hi January 14 khan tan-inah sawn a ni a, a awmna tur hmun hi a hmain minister of home affairs, lieutenant genral Soe Htut pawhin a lo endik vek a ni. A tanna hmun hi tanin hospital bul maia awm niin an sawi bawk.

Kum 71 mi, Myanmar presi­dent hlui hi sipaiten thuneihna an chan hnuah eiruk, sipai laka hel tura mipuite fuih, Covid-19 kaihhruaina dan bawhchhia leh thubuai hrang hrang siamsak a ni. A thubuai ṭhenkhatah chuan thiam loh chantir a ni tawh bawk. Mahse President hlui chuan an puhna te hi thudik lo a nih thu a sawi.