SKorea slum area-ah kangmei a chhuak

South Korea khawpui, Seoul-a slum area-ah nimin zing khan kangmei nasa tak a chhuak a, in 60 vel a kangchhia. Mi za tel chu sawnchhuah an ni.

Kangmei chhuahna hmun hi Guryong village a ni a, Seoul khawpuia slum area awmchhun a ni tawh. Kangmei chhuak hi kangṭhelhtu 900 chuang leh helicopter eng emaw zat hmangin ṭhelh a ni a, darkar nga hnuah an ṭhelh mit thei a ni.

Switzerland-a World Economic Forum summit hmanga thang mek, president Yoon Suk-yeol chuan chhiat­na tawkte ṭanpui leh chhawm­dawl hna theihtawpa thawk turin thuneitute a hriattir.

Kangmei chhuah chhan tak hi hriat chian a la ni lo a, mahse he hmunah hian a hma pawhin tuilian leh kangmeite an lo tuar fo tawh a ni. Korea Times-in a tarlan danin, Guryong hmunah hian kum 2009 aṭang khan ṭum 16 zet kangmei a lo chhuak tawh a ni.

Guryong hi SKorea rama district changkang leh nawmchenna hmunpui, Gangnam district bul maia awm a ni. Kum 1980 chhoa sipai sorkar a din laia develop­ment project thawhna tura an awmna hmun aṭanga sawnchhuahten an din a ni. He hmun hi cheiṭhat tumin hma lak ṭhin ni mah se, tualchhung mite leh local governing body-te inkara inhriatthiam lohna awmṭhin avangin hma an la thei lo a ni.