China-ah Covid-19 hri kai damdawi-ina dah 70% in an pung

China rama Covid-19 hri leng mekah, hri kai damdawi-ina dah luh an pung nasa hle.

World Health Organisation (WHO)-in January 19-a weekly report a tihchhuahah, a kar hmasa lam aiin hri kai, damdawi-ina dah luh ngai hi 70% in an pung a, mi 63,307 an tling. Kum thum liam taa Covid-19 hri a len tirh aṭangin hri kai enkawl ngai awm zat hi an tam ber ṭum a la ni.

China hian nikum kumtawp lam aṭangin Covid-19 khuahkhirhna a siamte a hlip chho a, hetih lai hian an ramah hri hi nasa takin a darh zui a ni. Hetih lai hian hri leng chungchangah report kimchang a tichhuak tawh lo bawk. Kar liamtaa report a tihchhuahah, December 8 - January 12 inkar khan damdawi-inah Covid hri kaihhnawiha thi mi 60,000 dawn an awm tih a tarlang. Mahse hetah pawh hian in lama thi te chhiar tel an ni lo.

China holiday pui ber, Lunar New Year chu naktuk aṭangin a inṭan dawn a, hemi hmang tur hian ram hrang hrang aṭangin an haw khawm bakah, khualzin tam tak an kal bawk a, hei hian hri hi a tihdarh lehzual hlauhthawnna a lian hle. Health expert-te chuan kumin chhungin Covid-19 vang hian mi maktaduai khat vel an thi dawn niin an chhut. Mahse China national health mission chuan an rama hri leng chuan a vanglai a thleng tawh niin a sawi ve thung. Damdawi-ina hri kai enkawl mek, ngaihtuahawm zual awm zat pawh a tlahniam zel tawh niin a sawi.