Brazil President-in sipai hotu lu a ban

Brazil president Luiz Inacio Lula da Silva chuan president hlui Jair Bolsonaro thlawptuten sorkar building pawimawhte an beihna kal zelah, an ram sipai hotu lu ber general Julio Cesar de Arruda a ban.

President Lula chuan hemi chungchangah hian thuchhuah siam lo mah se, Brazilian armed forces official website chuan sipai hotu lu ber a nihna aṭangin general Arruda chu ban a nih thu a tarlang . Arruda thlaktu atan hian Southeast Military Command hotu, general Tomas Miguel Ribeiro Paiva chu ruat nghal a ni.

January 8 khan President hlui Bolsonaro thlawptute chuan an ram khawpui, Brasilia-a National Congress, presidential palace leh Supreme Court building-te luhchilhin an suasam a ni. Buaina siamtute hian President thlannaa Lula chakna chu hnawl a nih theihna tura sipaite inrawlh turin an phut. President Lula chuan he buaina siamtute hi sipai ṭhenkhat nen an inthurual nia a lan thu sawiin, presidential palace vengtu eng emaw zat chu a lo thlak tawh bawk.

Bolsonaro thlawptuten buaina an siam kaihhnawihah hian mi 2,000 chuang man an ni tawh. Supreme Court pawhin buaina siam tura mipuite fuiha puh chungchangah, Bolsonaro pawh chhui chian tur zingah a telh.