Tel Aviv-ah lungawi lohna lantir leh
Israel prime minister Benjamin Netanyahu kaihhruai ṭangrual sorkarin an ram judicial system thlak danglam a tumna chu duh loin, Inrinni kha Tel Aviv-ah mipui tam takin lungawi lohna an lantir leh. Hei hi lungawi lohna an lantir kar thumna a ni tawh. Tel Aviv-a pungkhawmte hi mi nuai khat an tling nia sawi a ni.
Tel Aviv-a pungkhawmte chuan an rama right-wing sorkar chu sorkar hlauhawm tak a ni a; hmeichhia, LGBTG leh dinhmun chhe zawkte bakah Palestinian mite tan sorkar thar chu a hlauhawm a ni, an ti.
Eptu hruaitu, Yair Lapid chuan ram hmangaihtute chu democracy leh court-te venghim turin an pungkhawm tih a sawi a, judicial system thlak danglam a tumna sorkarin a sût hma chu lungawi lohna an lantir zel tur thu a sawi. Israel Bar Association hotu Avi Chimi pawhin sorkar ruahmanna siam chu an duh loh thu sawiin, "Democracy nuaiboa dictatorship siam an tum a ni. Judicial authority tihchhiat vek an duh a, mahse judicial authority tel lo chuan democracy ram a awm thei ngai lo," a ti.
Hetih lai hian PM Netanyahu chuan nawrh huaihawtte thil phut chu hnawlin; judicial system thlak rawtna chu parliamentary committee-in a zirchian mek thu leh, he system thlak hian court thuneihna tinep loin rualkhai takin a siam zawk tur thu a sawi.