Netanyahu-a'n Health Minister Aryed Deri a ban

Israel ṭangrual sorkar thara prime minister, Benjamin Netanyahu chuan Supreme Court thupek angin, health and interior minister Aryeh Deri chu Pathianni khan minister a nihna aṭangin a ban.

Aryah Deri hi nikum khan chhiah awlrua puh chungchangah thiam loh chantir a lo ni tawh a, hei vang hian Supreme Court chuan cabinet minister-ah a awm thei lo ang, tiin kar liam ta khan a sawi a ni.

Supreme Court thupek tihchhuah hnuah, Pathiannia cabinet meeting-ah PM Netanyahu chuan a minister hi ban a nih thu a puang.

Ultra-Orthodox Jewish party Shas hruaitu Deri hi Netanyahu chuan a kaihhruai right-wing sorkara minister tur hian nikum December thla khan a ruat a ni. Minister aṭanga ban a nih hnuah, a portfolio hi Shas party hruaitu dang hnenah pek a ni dawn nia sawi a ni.

PM Netanyahu chuan Aryed Deri hi cabinet member-ah dah a nih leh theih dan kawng a zawng dawn niin a sawi. Israel Parliament-ah hian thla hmasa khan khan thiam loh chantir tawh, mahse jail-a tan tir kher lohte chu minister an nih phalsakna tur dan an lo pass tawh a ni.

Right-wing sorkar thar hian an ram judicial system siam danglam turin rawtna pawh a siam tawh a, dan thar siam tumah hian Supreme Court thuneihna ṭhenkhat chu tihnep a ni dawn a, Parliament member-te chu judge ruat tur thuneihna leh, Supreme Court thutlukna lo siam tawh pawh hnawl theihna tur thuneihna pek tum a ni. Hei hi duh loin, eptute chuan hun eng emaw chen nawrh an huaihawt tawh bawk.

Israel ram hian Constitution hran a nei lo a, hei vang hian Supreme Court chuan an ram dan ṭha tawk lo leh awmze nei lo nia ngaitute chu hnawl turin thuneihna a nei a ni.