Japan PM-in mihring punna tlahniam zel buaipui vat a ṭul tih a sawi

Japan prime minister Fumio Kishida chuan an rama mihring punna tlahniam zel chungchang chu buaipui a, rang taka hma lak a ngai tawh tih a sawi.

Kumin atana Parliament session hmasa ber hawnna inkhawm, nimina neihah PM chuan he thu hi a sawichhuak a, "Naupiang zat tlahniam leh, naupang enkawlna chungchangte hi kan ngaihven thuai a ṭul a, muangchan chi a ni tawh lo," a ti.

Kishida chuan naupang kaihhnawih policy kalpuina tur budget pawh a leta tihpunna tur ruahmanna chu June thlaah a thehlut dawn tih a sawi bawk.

Japan ramah hian mihring awmzat a tlahniam zel a, data mumal taka siam a nih hnuah kum 2021 khan naupiang an tlem ber kum a ni.

Ministry of Internal Affairs and Communications-in data a tihchhuah thar berah, kumin January 1-a mihring awm zat chu maktaduai 124.77 a ni a, kum 2022 January 1-ah mihring awm zat maktaduai 125.308 aṭangin mihring kiamna hi 0.6% a tling.

Naupiang thar an tlem zel avangin naupang, kum 0-14 inkar awm hi maktaduai 14.45 niin, hei hi Japan mipui awm zat aṭanga 11.6% chauh a ni pha. Hetih lai hian kum 65 chunglam chu 29%, mi maktaduai 36.21 an awm thung.