World Health Oganisation (WHO) chuan nikum lamah khuh damdawi, cough syrup avanga naupang eng emaw zat thihna a thlen hnuah, a kaihhnawih thuneitute chuan damdawi ṭha lo laka naupangte himna tura rang taka hma an lak a ṭul thu a sawi. 
Kum 2022 khan Gambia, Indonesia leh Uzbekistan-a naupang thi zinga 300 chuang, a tam zawk kum 5 hnuai lam, te thihna chu khuh damdawi an ei nena inzawmna neia sawi a ni. Heng naupangte hian kal (kidney) lamah harsatnate an nei niin an tarlang. An khuh damdawi eiah chuan diethylene glycol leh ethylene glycol level a sang lutuk nia sawi a ni. 
WHO chuan hengte hi toxic chemical, industrial solvent leh antifree agent atana hman ṭhin niin, mihring tan tlemte pawh ei a nih chuan thihpui theih a ni a, damdawiah hengte hi an awm tel tur a ni lo, a ti. 
Heng thil thleng vang hian WHO chuan medical supply chain lama inhnamhnawih zawng zawngte chu thawkho a, damdawi ṭha lo laka naupang himna tura hma la turin a ti. WHO member ram 194-te pawh a ṭul anga hma la turin a hrilh bawk. 
 Gambia leh Uzbekistan-a naupang eng maw zat thihna nena inkaihhnawihna nei nia puh, India rama Maiden Pharmaceuticals and Marion Biotech khuh damdawi siamte pawh zuar chhuak tawh lo turin a lo ti tawh. Hei bakah hian Indonesia rama cough syrup siamtu, PT Yarindo Farmatama, PT Universal Pharmaceutical, PT Konimex leh PT AFI Pharma-te pawh warning a lo pe tawh bawk.