California-a inkahnaah mi 7 an thi

US-a Los Angeles, California-a Chinese Lunar New Year lawmnaa inkahna thleng vanga mi 11 an thih hnuah, Thawhṭanni khan California hmarlama Half Moon Bay-ah ṭum hnih inkahna thleng lehin, mi pasarih an thi.

Los Angeles-a pawikhawihna a thlen aṭanga darkar 48 pawh a liam hmain, inpawngkahna dang hi a thleng leh a ni.

San Mateo County Board of Supervisors President Dave Pine chuan Thawhṭanni khan Hafl Moon Bay-a mushroom farm leh trucking business hmunah inkahna hi a thleng niin a sawi. Sheriff Christian Corpus chuan pawikhawihna thlen chhan hi hriat chian ala ni lo tih sawiin, pawikhawihtu nia puh, Half Moon Bay-a cheng, kum 67 mi Chunli Zhao chu man a ni tawh tih a sawi bawk. Zhao motor-ah hian semi-automatic handgun hmuh a ni a, thurualpui a nei lo nia hriat a ni.

Gun Violence Archive-in a tarlan danin, tun thla chhungin US-ah hian inpawngkahna, mass shooting hi ṭum 38 a thleng tawh. Archive hian inkahna thlenga mi pali emaw a aia tam emaw thi leh hliam awmna chu mass shooting tiin a chhiar.