Germany-ah Myamnar activist-ten sipai hotute laka complaint thehlut

Myanmar acitivist leh sipaite nghaisakna tuartu nia sawi mi 16-te chuan Germany court-ah Myanmar sipai hotute lakah criminal complaint an thehlut.

Complaint an thehluhah hian Myanmar rama Rohingya Muslim-te suatna leh, kum hnih liamtaa sipai sorkar a din hnua mipuite chunga rawng taka chetna thlengah sipai hotute chu mawhphurtuah an puh a ni.

Human rights group, Fortify Rights chuan complaint thehlut chu an thlawp tih sawiin, complaint thehluhna atana Germany thlan a nihna chhan chu 'universal jurisdiction' an pawmpui avang te, national court-ten international crime titua puhte chungthu an ngaihtuah theih vangte a nih thu a sawi. Nikum khan Germany court chuan Syrian intelligence officer hlui chu Syria civil war laia mi that, pawngsual leh pawikhawihna dang thlena puh a nih chungchangah dam chhung tang turin a lo hrem tawh a ni.

Fortify Rights co-founder leh chief executive officer, Matthew Smith chuan Bangkok-a news conference a neihah, "Complaint thehluhah hian Mynanmar sipaite hian mi thah, pawngsual, nghaisak, hrenbeh leh insuatna thlenna tura pawikhawhanna hrang hrang an kalpui a ni tih finfiahna tharte a tarlang tel a ni," a ti. Germany thuneitute chuan complaint thehluh hi bawhzuiin, Myanmar sipai hotute chu an chhui zui dawn tih a sawi bawk.

Myanmar sipai sorkar chuan complaint thehluh chungchangah hian sawi a la nei lo a, a hma pawhin mihring dikna chanvo palzut nia puhna chu a lo pha fo tawh a ni. Sipaiten thuneihna an chan hnua an sorkar dodaltu chungah rawng takin an che nia puhna chu thu dik lo niin a sawi.