US leh Germany-in Ukraine tan tank an thawn dawn

United States (US) leh Germany chuan Ukraine president Volodymyr Zelenskyy-a'n a ngen angin, Ukraine sipaite tan indonaa hman tur tank lian an thawn dawn tih an sawi.

President Zelenskyy hian Thawhlehnia zana video a tichhuahah, khawthlang ramte chu battle tank-te pe tura ngenin, Russia nena an indo meknaah an mamawhna a nasa hle tih a sawi. Hetih lai hian Russia chuan Ukraine hnena indona ralthuamte pek a nih chuan indona hi a zual zel dawn a, khawvel pum tan buaina pawh a thlen thei dawn a ni tiin a lo vau let ve thung.

US leh Germany hian Russia-in Ukraine a do hnuah, Ukraine sipaite puihna leh chhawmdawlna turte pe fo mah se, indona ralthuam lian erawh a la pe lo a, heng hi a pek chuan Russia-in buaina lian zawk siamchhuahna chhuanlam atana a hman an hlauthawng ṭhin a ni. Mahse President Zelenskyy-a'n ngenna a siam leh hnuah, battle tank hi pek an tum ta a ni.

Ukraine sipaite hman turin US hian M1Abrams tank 30 thawn a tum a, Germany hian Leopard 2 tank 14 thawn a tum bawk. Ram pahnihte hian an tank thawn tur chungchang hi official-a an puanchhuah thuai rin a ni. Hemi rual hian eng hunah nge tank hi thawnchhuah a nih dawn leh, Ukraine ram a thlen theih hun tur erawh sawichian a la ni lo.

Britain chuan Ukraine tan Challenger Two tank a thawn tur thu a lo sawichiang tawh a, Poland pawhin Germany siam Leopard 2 tank hi thawn a tum thu sawi mah se, export rules hnuaiah a siamtu Germany aṭangin phalna a hmuh phawt a ngai a ni.