NKorea-in an ram khawpuiah ni 5 chhung inkharkhip a puang

North Korea sorkar chuan an ram khawpui, Pyongyang-ah thawk lama harsatna tawka damlo an pun chhoh avangin nimin aṭang khan ni nga chhung inkharkhip, lockdown a puang.

Sorkar thuchhuah chuan he natna chungchang hi sawchiang lo a, Covid-19 hri kaihhnawih a nih leh nih loh pawh a sawilang lo. Mahse khawpuia chengte chu Pathianni thleng in lamah tawmim tura tiin, an taksa temperature-te pawh nitin endik ṭhin turin a ti niin South Korea-a NK News chuan a tarlang.

Thawhlehni khan Pyongyang khawpuia chengte hian ei leh in tur lam pawh an inlamkhawm nasa nia tarlan a ni a, ramchhung hmun dangah lockdown hi puan tel a ni em tih erawh hriatchian a ni lo.

Khawvel ram hrang hrangte Covid-19 hri leng vanga an buai viau lai khan North Korea chuan an ramah hri kai hi an awm lo niin hun rei tak chu a lo sawi a, nikum kumtir lamah hri kai hmuhchhuah an nih thu a puang ve chauh a ni.

Hri kai hmuchhuah zat pawh hi mumal taka tarlan a ni lo a, nikum August thla vek khan an rama hri leng chu hneh a ni tawh niin a puang zui leh nghal a ni.