China-in Covid vanga Thi zat 80% in tlahniam tih a sawi

China chuan an rama Covid-19 hri leng mekah, tun thla tir lam aṭang khan hripui vanga thi zat hi 80% dawnin a tlahniam tih a sawi.

Center for Disease Control and Prevention (CDC) chuan Nilaini khan hri leng chungchangah thuchhuah siamin, January 4 hnu lam aṭangin hripui vanga damdawi-ina thi zat hi 79% in a tlakhniam thu a tarlang. Hospital-a hri kai enkawl, na zual zat pawh 36,000-ah tlahniamin, January 5 aia a tlakhniamna hi 72% a tling tih a sawi bawk.

China public holiday lian ber, Lunar New Year an hman lai a ni a, he kut hman lai hian zin veivak an tam dawn avang leh, punkhawmnate a tam dawn avangin hri hi a darh nasat hle a rinawm thu an lo sawi tawh a ni. Thawhlehni thleng khan Luar New Year hmang tura an ram chhunga veivak hi maktaduai 664 an tling niin state broadcaster CCTV chuan a tarlang.

Health expert-ten holiday laia hri a pun hluai a rinawm thu an sawi laiin, sorkar thuchhuak erawh chuan hri leng a ziaawm thu leh, thihpui an tlakhniam thu hi a tarlang ta zawk a ni.

Mahse China report tihchhuah hi ram dangte an ring tawk lo tih an lo sawi fo tawh a, an ram dinhmun kimchang tak tarlang loah an ngai a ni.