Russia-in US leh Germany tank-te halsakah vau

United States (US) leh Germany-in Ukraine sipaite puihna atan, indonaa hman tur tank lian an thawn dawn tih an sawi hnuah, Russia chuan heng tank-te hi Ukraine an thlen hnua halsakah a vau zui ve nghal.

Ukraine president Volodymyr Zelenskyy-a'n khawthlang ramte chu tank pe tura ngenna a siam hnuah, US leh Germany hian an thawn tur thu an sawi. US hian M1 Abrams tank 31 leh, Germany-in Leopard 2 tank thawn an tum tih an puang a ni. Heng tank pahnihte hian in anna an neih rualin, an engine hman erawh a in ang lo thung. Abrams hian turbine engine a hmang a, Leopard 2 hian diesel-powered MTU MB 873 engine a hmang a, hei hi enkawl a awlsam a, Europe-ah pawh an hman lar zawk a ni.

US-in thawn a tum, Abrams tank hi Ukraine tan enkawl a harsa dawn nia sawi a ni a, a hman dan turah training pawh an neih hmasak phawt a ngai ang. US leh Germany hian battle tank an thawn tur thu hi puang tawh mah se, eng hunah nge thawnchhuah a nih dawn erawh an sawi lang lo.

Russia chuan khawthlang ramten Ukraine sipaite hman tur tank an thawn a nih chuan, ram pahnihte indo meknaah 'direct'-a an inrawlhnaah an ngai dawn tih a sawi. Hei hian indona pawh a tizual zel zawk dawn a ni, a ti.