Myanmar sipaiten thuneihna an chelh hnuah poppy chin a hluar : United Nations

United Nations Office on Drugs and Crime (UNODC) chuan Myanmar sipaiten kum 2021-a civil sorkar thuneihna hnehchhuh a, rorelna an chelh aṭangin ruihhlo, heroin siamna atana hman, opium poppy chin a hluar chho hle tih a sawi.

UNODC chuan kum 2014-2020 inkarah dan phal loh, poppy chin hi a tlakhniam hnuah, kum 2021 aṭangin an ching uar chho hle tih a sawi. Kum 2022 chhung bik khan poppy chinna hi 33% zeta pung chhoin, an tharchhuah pawh 88% velin a pung a ni, a ti.

Kum 2022-ah Myanmar ramah hian poppy hi ram hectare 40,000 (acre 99,000) chuanga chin a ni a, heng aṭang hian opium hi metric ton 790 vel thar a ni, a ti. Nimina Myanmar Opium Survey 2022 report tihchhuahah, UNODC chuan 2022 result aṭang hian Myanmar rama poppy chin a hluar chhohzia a langchiang hle tih a tarlang.

Sipaiten thuneihna an chan hnuah an ram economy thlengin a buai chho a, hei vang hian a bikin border state leh hmun kilkhawr zawka chengte tan poppy chin leh mai loh chu thlan tur an nei lo a ni, tiin UNODC regional representative, Jeremy Douglas chuan a sawi.

Poppy chin a hluar chhoh leh hnuah, heroin hmanga sum­dawnna pawh a lian chak hle. Ruihhlo hmanga sumdawnna hi USD tld 10 hu a tling chho hman niin survey chuan a tarlang bawk.