Israel Prime Minister Bâng turin an phût

Israel prime minister Benjamin Netanyahu kaihhruai sorkarin Covid-19 dona kawnga hmaa lak duh loh vang leh, eiruk thubuai nei PM an duh loh vangin PM chu bang tura phûtin nimin khan Jerusalem-a a chenna in kawtah mi eng emaw zat an pungkhawm.

Thla hlui aṭang tawh khan hripui leng mek dona kawnga sorkar hma lak dan duh loin Tel Aviv-a Rabin Square-ah nawrh an lo huaihawt fo tawh a ni. Sorkarin hri darh tur venna atana inkharkhipna a kalpui avangin mi tam tak hna thawk thei loin an awm a, hna chan phah eng emaw zat awm bawk tih an sawi. Sorkar chuan heng harsatna tawkte hi a ngaihsak tawk lo a, chhawmdawlna a pe ṭha lo niin an sawi an ni. Hri leng vang hian an rama unemployment rate pawh 20% in a sang tawh tih an sawi. Nimina pungkhawmte hi mi 1,000 vel an ni. 

PM Netanyahu chuan an rama Covid-19 leng vanga harsatna tawkte chhawmdawlna pek an ni dawn tih a tiam a, mahse hei hi vawiin thlengin a la tihhlawhtlin loh avangin PM a nihna aṭanga bang turin mipuite chuan an phût zui bawk. Netanyahu hi Covid-19 dona kawnga a hmalakna ṭha an tih loh vanga bang tura an phut bakah eirukna kaihhnawiha a fihlim loh avang pawhin bang turin an phût bawk a ni. May thla tawp lam khan Netanyahu hi eiruk thubuai an siamsak chu Jerusalem court-ah ngaihtuah ṭan a ni a, Israel PM ni lai zinga eiruk thubuai hmachhawn hmasa ber a ni.

Nikum November thla khan sumdawng hausate hnen aṭangin dan kalhin thilpek dawngah leh, a thuneihna dik lo taka hmanga puh a ni. Thubuai siamsak ni mah se thiam loh chantir a nih hma chuan PM aṭang hian a ban kher a ngai rih lo. Israel-ah hian Covid-19 kai hi mi 72,283 an awm tawh a, heng zinga mi 45,629 chu enkawl dam ni tawhin, he hri vang hian mi 527 an thi tawh a ni.