Bangladesh-a Rohingya camp-ah Covid-19 kai hmuh a ni
Khawvela raltlante awmna camp lian bera sawi, Bangladesh-a Cox bazar-a Rohingya raltlante awmna camp-ah Covid-19 kai pahnih hmuhchhuah a ni tih official-te chuan an tarlang.
Kum 2017 kum tawp lam khan Myanmar aṭangin Rohingya raltlante hi Bangladesh-a raltlante camp-ah hian an awm ṭan a, mi maktaduai khat vel an cheng a ni. Hri kai hmuhte hi isolation centre-ah dah nghal an nih thu Refugee Relief and Repatriation Commissioner, Mahbub Alam Talukder chuan a sawi.
Camp-a Covid-19 kai hmuh an nih avang hian an hnaihvai mi 1,900 te chu test turin dah hran an ni a, Cox bazar-a raltlante chhawmdawl hna thawktute chu fimkhur nghal tura hriattir an ni bawk.
Bangladesh-a Save the Children health director, Dr Shamim Jahan chuan mi maktaduai 160 vel chenna, an ramah chuan ventilator 2,000 chauh an neih thu a sawi.
Raltlante camp-a hri a luh tak avangin a darh belh zel rin a nih thu leh, damdawi-ina khum leh ventilator-te chuan an daihkhawp dawn loh thu te, he camp-a mihring chengte an thih ṭeuh a hlauhthawn thute Jahan chuan a sawi bawk a ni.
International religious freedom US ambassador, Sam Brownback chuan camp-ah hian raltlan awmte chenna hi a bit em em thu a sawi a, hei vang hian hri inkai darh hi a hlauhawm hle tih a sawi. Hri hi lo darh ta se, a inenkawlna lamah indaih lohna a awm avangin harsatna nasa zawk a thleng thei a ni, a ti bawk.
Bangladesh-ah hian Covid-19 kai hi mi 20,065 an awm tawh a, heng zinga mi 3,882 chu enkawl dam tawh niin, he hri vanga thi hi mi 298 an awm tawh bawk a ni.
Khawvelah hri kaimtd 4.5 awm tawh
Coronavirus kai chu nimin khan khawvel ram hrang hrangah mi 45,43,044 an awm tling tawh a, he hri vanga thi hi mi 3,03,707 an awm tawh bawk.
US chu hri kai tamna leh thi tamna ber ram a la ni zel a, mi 14,00,500 in kai tawhin an zinga 84,985 chuan he hri hi an thihpui tawh a ni.
Russia-ah hri kai nasa taka pung chhoin, khawvel ram zingah hri kai tamna ram pahnihna a ni tawh a, Covid-19 hmuh tawh zat hi mi 2,52,245 an tling tawh a ni.
UK-ah hri kai hi mi 2,34,431 awmin Spain-ah 2,29,540 leh Italy-ah 2,23,096 an awm tawh bawk a ni.