Berlin-ah khuahkhirhna siam duh lohna lantir

Germany sorkarin hripui leng mek darh tur venna atana khuahkhirhna siam a, midang hlat awmna, social distancing dan a siam chu duh loin Inrinni khan Berlin-ah mi tam takin kawng an zawh. 

Social distancing dan duh loa pungkhawmte hi mi 17,000 vel an tling a, Brandenburg Gate aṭanga central Berlin panin kawng an zawh a, mahse police-ten an hnawtdarh a ni. Kawngzawhnaa tel tam zawkte hian mask an vuah duh loh bakah, social distancing dan pawh an zawm duh lo a ni. Khawlai mask vuah an hmuhte chu au elin, la thla turtein an ti. 

Khuahkhirhna dan siam duh loa nawrh an huaihawt hi 'Day of Freedom' tiin an vuah a, neo-Nazi group ṭhenkhatten an thlawp a ni. Berlin khawpui bakah state dangahte pawh lungawi lohna hi an lantir a ni. Germany sorkar chuan March thla laihawl aṭang khan coronavirus leng vangin inkharkhipna khauh tak a kalpui a, April thla tawp lam aṭang khan khuahkhirhnate hi thlahdul ṭan a ni. Mahse mi tam tak punkhawm erawh khap chhunzawm a la ni a, dawr leh public transport-ahte mask vuah vek tura tih a ni bawk.