China-in Hong Kong-ah team tir lut

China chuan Hong Kong-a hri kai an pun chhoh zel avangin Covid-19 test zau zawka neihna kawnga thuneitute pui turin health team a tir. 

Health team-ah hian member 60 an awm a, an zinga official pasarih chuan nimin khan Hong Kong an thleng. He team member-te hi Guangond province-a public hospital-a thawkte an ni a, anni bakah Covid-19 darh ṭanna khua Wuhan aṭangin special team tirhluh an ni bawk.Tun ṭum hi China  health official-ten Covid-19 dona kawnga Hong Kong an vawi khat puihna tur a ni. 

July thla aṭang khan Hong Kong-ah hian Covid-19 hri leng hi local transmission a ni awm tawh niin sorkar lam chuan an ngai a, hei vang hian khauh taka inkhuahkhirhna pawh kalpui nghal a ni.Kar liam ta Inrinni khan Hong Kong chief executive Carrie Lam chuan China puihna a ngen thu leh an ram hri leng chuan hluar lam a pan mek thu a sawi. Hengte avang hian China chuan Hong Kong-a hri kai hriat chhuah zung zung an nih theih nan nimin aṭang khan team a tir lut ṭan ta a ni. 

Hetih lai hian Hong Kong mi ṭhenkhatte chuan an rama hri test zau zawka kalpui a nih theihna atana China hma lak tumna hi test neihpakte DNA sample kaltlanga ram mipuite en thlithlai a tumnaah an ngai thung. Hong Kong-a Covid-19 kai hi mi 3,398 an tling tawh a, enkawl dam mi 1,858 awmin he hri thihpui hi mi 33 an awm tawh.