Myanmar sipai sorkarin Political party-te tan dan thar siam

Myanmar sipai sorkar chuan an rama political party-te tana kaihhruaina dan khauh tak a siam thar chu nimin khan a tichhuak.

Dan thar tihchhuahah hian political party-te chu thla hnih chhung ngeiin sipai sorkar hnuaia election commission-ah in register ṭha leh vek tura tih a ni.

National party tinte chuan an in register aṭanga ni 90 chhungin party member nuai khat tal an nei ang tih an intiam a ngai a, ni 180 chhungin an ram khawpui lian zahveah tal office an hawn a ngai bawk ang. Heng dan zawm kim thei lote chu political party an nihna tihtawp sak an ni dawn a ni.

Sipaiten dan an siam tharah hian political party-ten member an neih zat an tarlan finfiah a nih dan tur sawichian a ni lo thung.

Sipai hotu lu ber, general Min Aung Hlaing chuan tun thla tir lam khan an ram inthlanpui buatsaih a nih tur thu a lo sawi tawh a, a hun tak erawh a sawilang lo a, kumin kumtawp lamah an neih rin a ni.

Myanmar ram ṭhianṭha, Russia chuan sipai sorkarin inthlanpui buatsaih a tum chu a thlawp thu a sawi laiin, US erawh chuan sipai rorelna hnuaiah inthlan felfai leh dik tak neih theih a ni dawn lo niin a sawi thung.

Regional party tlem azawng chuan inthlanpui neih tur hi an chuh mai thei tiin an sawi a, hetih lai hian sipai thlawp, Union Solidarity and Development Party (USDP) erawh chuan inthlan neih tur atan hian ram chhung hmun hrang hrangah ṭan a la chho mek a ni.