Israel-in thlawhtheihna hmangin Gaza Strip a bei
Israel sipaite chuan West Bank-a Jenin refugee camp an neih hnuah, nimin khan Gaza Strip chu thlawhtheihna hmangin an bei zui leh.
Israel indo thlawhtheihnate hian Gaza-a al-Maghazi refugee camp an bei a, Gaza City chhim lama al-Zaitoun leh hmar lama Beit Hanoun-a open area pawh an bei tel bawk. Fighter-te an tirh hma hian Israel drone chuan heng target-te hi missile hmangin a beih hmasa phawt niin Gaza tualchhung media-te chuan an tarlang. Israel-ten an beihnaah hian thi leh hliam report erawh hriat theih a la ni lo.
Hetih lai hian Israel sipaite chuan Ningani zanlai vel khan Gaza aṭangin Israel hi rocket pahnih hmanga kah a ni a, hemi chhanletna atan hian beihpui hi an thlak zui ve nghal tih an sawi. Sipaite chuan Palestinian-te rocket kah hi air defence sytem chuan a lo dang tih an sawi.
Palestinian pawl zingah rocket kapchhuaktu nia inchhal hi an la awm lo. Mahse Gaza Strip-a rorellai, Hamas pawl thupuangtu Hazem Qassem chuan an pawl chuan Palestinian mipuite leh an ram venghim turin an bei zel dawn tih a sawilang thung.
Israel-in Palestinian ramte a beih leh avang hian United Arab Emirates, China leh France chuan United Nations Security Council (UNSC) chu closed door meeting ko turin an ngen.