Donald Trump-a'n China nena inlaichinna tihtawp vekah vau
United States (US) president Donald Trump chuan coronavirus leng chungchanga China laka a lungawi lohna lantir chhunzawm zelin, China leh US-in inlaichinna an neih zawng zawngte tihtawp vekah a vau.
China rama Wuhan khawpui aṭanga darh, Covid-19 hian khawvel a tibuai mek a, US chu he hri leng tuar nasa ber ram a ni mek a ni. Hri vang hian khawvel ram hrang hrangah mi nuai thum dawn an thi tawh a, US bikah mi 80,000 chuangin an thihpui tawh a ni.
Trump chuan hri leng chungchangah China chu thil zep nei leh, a nihna dik tak puangzar duh lohah a lo puh fo tawh. World Health Organisation (WHO) pawh hri leng dona kawngah China lam awn bikah puhin, WHO-a US-in fund a pek ṭhin pawh a lo titawp tawh bawk.
US chuan Wuhan laboratory-ah ram dang aiawhte an kal a, coronavirus nihna dik tak an zirchian phalsak turin China hi a lo phut fo tawh a ni. Mahse China chuan a remti lo a ni.
Ningania Fox Business News-in an kawmnaah, President Trump chuan China lakah thil tih theih tam tak an nei thu te, an inlaichinna zawng zawng pawh an tihtawp vek theih thute a sawi. China president Xi Jinping chuan inpawh ṭha tak an nih thu a sawi bawk a, mahse tun dinhmunah erawh China lakah a lungawi loh em avangin president Xi pawh a be duh lo tih a sawi bawk a ni.