East Jerusalem-a inkahna thlengah Israel mi 7 an thi PM Netanyanu-a'n Israel mite thuam chakna tur ruahmanna siam
East Jerusalem-a synagogue pawnah Zirtawpni liam ta zan khan Palestinian mi pakhat chuan silai hmetpuakin, mi pasarih an thi a, mi dang pathum an hliam. Israel police-te chuan silai hmetpuaktu hi an kaphlum ve nghal niin an sawi.
Pawikhawihtu hi East Jerusalem-a refugee camp-a khawsa a ni. Israel sipaiten West Bank-a Jenin refugee camp an beihnaa Palestinian mi pakua an kahhlum hnuah, he thil thleng hi Palestinian miten duh lohna an lantir hnuah, Synagogue-a Juda mi inkhawmte chu bitumin a silai hian a pawng kah ta nia sawi a ni.
Synagogue pawna pawikhawihna thleng hi kum 10 chuang chhunga Palestinian mite beihnaah ṭum khata Israel mi an thih tamna ber a ni.
Israel prime minister Benjamin Netanyahu chuan kum tak tam chhunga Israel-in beihna a tawh rapthlak ber zinga mi niin a sawi. Palestinian ram an luaha Israel mi chengte thuam chakna tur ruahmanna pawh a puang nghal bawk.
PM Netanyahu hian pawikhawihna thlen hnuah, Inrinni khan security cabinet meeting a ko nghal a ni. Netanyahu chuan Palestinian ram an luahah tharum thawhna leh pawikhawihna a thlen fo avangin, he hmuna Israel mi awmten ralthuam awlsam zawka an kawl theihna, gun permit pekna tur a siam dawn tih a sawi. Hemi rual hian Israel mi laka pawikhawihtu nia sawite chu an chenna in chu kharsak bakah, tihchhiatsak an ni zel dawn tih a sawi bawk a ni. Pawikhawihtu chhungte chuan social security benefit an dawn pawh an chan nghal zel ang.
Synagogue bula pawikhawihna thleng kaihhnawihah hian Israel police-te chuan mi 42 an man tawh a, an zingah hian silai hmetpuaktu chhungte pawh an tel.
Inrinni tlai khan Palestinian naupang, kum 13 mi chuan East Jerusalem-ah vek hian silai hmetpuakin, Israel mi pafa, kum 47 leh 23 mi a kaphliam. He thil thlenna bula mi pahnih lo awmte chuan Palestinian tleirawl hi an lo bei let nghal a, a hnuah police-te chuan a silai hi an laksak zui bawk. Hliam a tuar bawk avangin damdawi-inah an hruai nghal a ni.