Pakistan leh Peru-a chetsualna thlengah mi ṭhahnem tak thi

Pakistan-a hmun hniha chetsualna thleng­ah mi 51 an thi. Pakistan chhimthlang lamah bus pakhat chu nimin khan kawngthlang lamah chesualin a kang zui a, bus-a chuang mi 48 zingah 40 chu an thi niin sorkar official chuan a tarlang. "Hmuh tlak loh khawpin ruangte hi an chhia a ni," tiin Lasbela district-a senior official Hamza Anjum chuan a sawi.

Anjum hian mi pathum chu dama an chhanchhuah tawh thu sawiin, bus hi leidawh kianga ban chu a sut avanga chesual a nih thu leh, mi 48 an chuang niin a tarlang bawk.

Hei bakah, Khyber Pakhtunkhwa-a lawng chesualah nimin tlai thleng khan zirlai naupang 10 an thi tih nemngheh a ni tawh a, mi pakua vel chu tuiah hian zawn mek an la nih thu an sawi. Mitthi ruang an chharte hi naupang kum 7-14 inkar an ni a, naupang 11 chhanchhuah ni tawhin, paruk chu dinhmun ngaihtuahawm takah an ding a ni, tiin local police official Mir Rauf chuan a sawi.

Peru-a bus chesualah mi 24 an thi

Inrinni liam ta khan Peru hmarthlang lamah mi 60 chuanna bus chu khamah chesual bawkin, bus-a chuang zinga 24 chu an thi. Thi zinga a tam zawkte hi Haiti mi, an nihna hriat lohte an ni.

Tualchhung media-te tarlan danin, an chet­sualna hi hmun hlauh­awm tak "Devil's Curve" an tihah a thlen thu sawi mah se, chetsualna thlen chhan hi uluk zawka kalpui zel an tum thu an tarlang.

Chetsualna vanga hliam tuar mi ṭhahnem takte chu Lima hmar lam aṭanga km 1,000 a hla, El Alto leh Mancora dam­dawi inah hruai an ni.

Haiti aṭanga Peru rama pem lutte hi a kum telin an pung zel a, bus-a chuang zinga a tam zawkte pawh hi Haiti mi an nih thu police-te chuan an sawi.