Imran Khan-a'n By-election neihna tur seat 33-ah chuh vek a tum
Pakistan prime minister hlui, Pakistan Tehreek-e-Insaf (PTI) party hruaitu Imran Khan chuan an ram Parliament, National Assembly-a by-election neihna tur, seat 33-ah chuh vek a tum.
PTI hruaitu Shah Mahmood Qureshi chuan by-election ah hian an party hmingin, seat zawng zawngah Imran Khan hi a ding vek dawn tih a sawi a ni.
Kar liam ta Zirtawpni khan Election Commission of Pakistan (ECP) chuan March 16-ah National Assembly seat 33-ah by-election neih a nih tur thu hi a puang a ni. Heng bialtu, PTI member-te banna thehluh chu speaker Raja Pervaiz Ashraf-a'n a pawmsak tak vangin inthlan ṭhat buatsaih hi a ngai dawn ta a ni.
Kum 2022, April thlaa Parliament lower house-in prime minister a nihna aṭanga Imran Khan paihthlak a nih hnuah, PTI member-te hian a rualin banna hi an thehlut ve nghal a ni. Mahse Speaker hian an zinga 11-te banna chauh chu pawmsakin, a bakte chu mimala koh an nih hnuah ngaihtuah ṭhat a nih tur thu a sawi. Thla riat chhung zet tikhawtlai a nih hnuah, Speaker hian PTI member dangte banna thehluh hi a pawmsak ve ta a ni. PTI lawmaker banna pawmsakte hi an vaiin mi 80 an tling.
Party thuchhuah chuan, by-election neihna turah hian Imran Khan bakah, venthawn thilah a bialtu ngaite chuan nomination paper hi an thehlut tel ve vek dawn tih a sawi. By-election neihna tur hi Punjab province-ah bial 12, Khybre Pakhtunkhwa-ah bial pariat, Islamabad-ah bial pathum, Sindh-ah bial pakua leh Balochistan-ah bial pakhat a ni.
Pakistan mosque-a bomb puakah mi 20 an thi
Pakistan-a Peshawar khawpuia mosque pakhat chhungah nimin khan thihchilh bomb a puak a, mi 20 an thi a, hliam tuar mi 96 an awm bawk.
He pawikhawihna hi ṭawngṭaina hun hman zawh, chawhnu dar 1.40 vela thleng a ni a, bomb puak hian mosque bang ṭhenkhat pawh a tichhe bawk. Report ṭhenkhat chuan bomb tipuaktu hi ṭawngṭaina hun hman lai pawhin tlar hmasaa a ṭhu niin an sawi.
Hliam tuarte hi Lady Reading Hospital-ah hruai nghal an ni a, an zinga mi 13-te chu an dinhmun a ṭha lo hle.