US-in May 11-ah Covid-19 emergency titawp tawh dawn

US sorkar chuan Covid-19 hri leng darh zel tur venna atana kum thum dawn liam taa a lo puan, Covid-19 emergency chu May 11 hian a titawp tawh dawn.

Hripui leng vang hian kum 2020 khan khatih laia US president Donald Trump chuan an ram pumah COVID-19 national emergency chuan public health emer­gency (PHE) a puang a, amah thlaktu president Joe Biden pawhin a rawn pawtsei chhunzawm ve leh a ni.

Heng emergency puan hnuaiah hian Ame­rican mite chuan a thlawnin test, vaccine leh enkawlnate an dawn theih phah a ni.

White House-a Office of Management and Budget (OMB) chuan emergency puan hi a tawp dawn hnai tawh a, mahse rei vak lo pawtsei lehin May 11-ah tihtawp a ni tawh dawn tih thuchhuah siamin a tarlang.

Emergency tihtawp a nih hnuah Covid-19 test leh enkawlnate hi private insurance leh sorkar health plan hnuaiah dah a ni tawh ang.

Covid-19 hri leng tuar nasa ber, US-ah hian hrileng hi a ziaawm tawh a, hetichung hian ni khatah hri vanga thi hi mi 500 chuangte an la awm niin sorkar data chuan a tarlang.