Sri Lanka President hluiin 2019-a pawikhawihna vangin ngaihdam a dil
Sri Lanka president hlui Maithripala Sirisena chuan kum 2019-a Easter Sunday-a an rama Catholic kohhran biak-in pathuma bomb tihpuah vanga mi 270 chuang thihna thleng chungchangah, Thawhlehni khan Catholic kohhran chungah ngaihdam a dil.
Kum 2019, Apri 21 khan Islamist firfiak pawl ISS nena inthlunzawm, National Thawheed Jamaat (NTJ) pawla mi pakuate chuan Catholic kohhran biak-in pathum leh luxury hotel-ahte thihchilh bomb an tipuak a, mi 270 chuang an thih bakah hliam tuar mi 500 chuang an awm bawk.
Firfiakten pawikhawihna thlen an tum chungchang hi sorkar lam hriattir an ni lawk chungin, pawikhawihna thleng tur an dan theih loh avangin hetih laia Sri Lanka president Sirisena leh prime minister Ranil Wickremensinghe-te chuan dem an hlawhin, mawhphurtuah puh an ni hial a ni. Mahse Sirisena chuan a puhna hi phain, defence lam inthlahdah vangin he pawikhawihna hi a thleng niin a sawi thung.
January 12 khan Sri Lanka Supreme Court chuan Sirisena hi bomb puak tuartute hnenah zangnadawmna, SLR maktaduai 100 pe turin a ti a ni. Hei hi a pek loh chuan court thupek zah lohah puhin, jail-ah khung theih a ni ang.