Palestinian-ten US laka lungawi lohna an lantir

US secretary of state Antony Blinken-a'n Israel ram a tlawh chu duh loin, West Bank leh Gaza Strip-ah Palestinian-ten lungawi lohna an lantir.

Pungkhawmte hian Palestinian flag kengin, US laka lungawi lohna thute an aupui. Palestinian mite dikna chanvo palzut sak an nih danah an lungawi loh thu leh, US chu Israel ṭan zawk zelah an puh. Israel a ṭan chhung chuan US chu thilsualtitu a ni ve zel a ni, tiin an sawi.

"Blinken hi Israel security tibuai zawnga thutlukna engmah siam lo tura Palestinian hruaitute nawr turin a rawn kal a ni," tiin, Palestinian thlawp lo zawng leh, Israel duhsak bikna a lantir chhung chu an lo lawm ngai dawn lo tih an sawi a ni. US chuan Israel mite hnena thu a lo tiam tawhte chu a ngaihsak zui lo a, Blinken-a'n an ram a tlawh pawh chu Palestinian mite tana hlawkpuina tur engmah awm lo a ni, an ti.

Kumin chhungin Israel leh Palestinian-te inkara buaina chhuakah, Israel sipaite chuan Palestinian mi 36 vel an kaphlum tawh a ni. Kum eng emaw ti chhunga January thla bika Israel-in West Bank-a beihpui a thlak nasat ber thla a ni bawk.

Middle East tlawh kual tura zin, Blinken hian Thawhṭanni khan Jerusalem-ah Israel hruaitute meeting a neihpui a, Thawhlehni khan Ramallah, West Bank-a Palestinian presidential headquarters-ah Palestinian president Mahmoud Abbas nen meeting an nei leh a ni.

Blinken hian Israel leh Palestinian mite chu an inkar boruak siamṭha tura nawrin, hemi rual hian US chuan Israel himna chu a ngaihpawimawh zel tur thu a sawi bawk. Hetih lai hian Abbas chuan Palestinian territory-a buaina leh inbeihna thlengah Israel sorkar chu mawhphurtu tiin a puh a, two-state solution leh inremna an lo ziak tawhte bawhchhiaah a puh a ni.