Australia pawisa note-a Queen Elizabeth thlalak thlak dawn

Australia chuan an pawisa, A$5 note-a Queen Elizabeth II thlalak chu an thlak dawn a, a aiah indigenous culture lam hawi an dah dawn.

Reserve Bank of Aus­tralia chuan thuchhuah siamin, sorkar nena inbiak ­rawn hnuah pawisa note-a thlalak dah hi thlak an rel tih sawiin, pawisa note lehlamah chuan Australian Parliament thlalak chu dah chhunzawm a ni ang, a ti.

Queen Elizabeth hi Australian ram hotu lu ber ani a, mahse nikuma lalnu a thih hnuah khan an ram hotu lu ber chung­changa inhnialna pawh a awm thar leh a ni. Kum 1999-a mipui ngaihdan lakah hian, ram hotu berah British lal awm chhunzawm duhtu hian vote tlemte chauhin an hneh tawh a ni. Queen Elizabeth II a thih hnuah, ama thlaktu a fapa, King Charles III chu Australia, New Zealand leh UK pawn lama Commonwealth ram 12-ah ram hotu lu ber a ni zui ve bawk. Mahse ram hotu an nihna hi a hming chauh a ni tawh thung.

Nikuma Queen Elizabeth a thih hnu khan, Australia chuan an ram pawisa, A$5 note-a Queen thlalak chu King Charles hian thlak a ni dawn lo tih leh, Australian kaihhnawih lam thila thlak a nih mai theih thu a lo sawi tawh a ni.