US-SKorea joint military drill-in NKorea a ti thinur

South Korea leh US chuan Nilaini khan joint air drill an nei leh a, strategic bomber leh stealth fighter-jet an hmang. He drill hian North Korea-in nuclear leh missile hmanga a vauna lakah lo inven leh danna tur ṭha leh rintlak an neihzia a lantir niin SKorean defence ministry chuan a sawi.

Ram pahnihte hian kumin joint drill an neihna hmasa ber a ni. Drill neih hma hian US defence secretary Lloyd Austin leh South Korea defence minister Lee Jong-sup-te chuan security lama an thawhdunna tihnghet leh tihlen zel an lo tiam tawh a ni.

Yellow Sea chunga joint drill neihah hian American B-1B long-range heavy bomber leh stealth fighter, US Air Force F-22 leh South Korean F-35-te an hmang.

Joint drill neih hian North Korea a tithinur leh hle. A hma pawhin NKorea chuan SKorea leh US sipaiten joint drill an neih ṭhin chu an ram beihnan an inbuatsaihna nia puhin na takin a lo sawisel fo tawh a ni. Joint drill neih a, ralthuam hlauhawm hman telte chu NKorea lakah nuclear ralthuam hman a ni dawn tia an sawina tlukah an ngai tiin NKorea official news agency, KCNA chuan a tarlang. Hetiang zela an chet chuan, NKorea pawhin 'ha aiah ha' tih chu a kalpui ve dawn a ni, a ti.

NKorea hian an ram hruaitu Kim Jong-un-a pa, Kim Jong Il piancham, February 16 hian 'Day of Shining Star' hmangin, military parade pui tham tak buatsaih a tum. Hemi ni vek hian spy satellite pawh kahchhuah a tum nia sawi a ni bawk.