Myanmar sipai sorkarin thu dik lo thehdarha puhte tan dan khauh tak siam

Myanmar sipai sorkar chuan ram phatsantua puh leh, thu dik lo thehdarha puhte lakah dan khauh tak a siam thar leh.

He dan siam thar hnuaiah, ram phatsantu leh thu dik lo thehdarha puhte chu military court-ah an chungthu ngaihtuah zel an ni ang. Sipai court-in hremna a pek tawh chuan, thi tura hremna tel loin, thiam loh chantir te chuan an appeal thei tawh dawn lo a ni.

Kum 2021, February thlaa sipaiten civil sorkar thuneihna an hnehchhuh hnuah, sipai sorkar duh lohna lantirtute lakah beihpui an thlak nasa hle a ni. Tuna dan a siam pawh hi sipai rorelna eptute a hrekbeh tumna pakhat nia ngaih a ni. Thu dik lo thehdarha puh journalist eng emaw zat chu jail-ah tantir an ni tawh bawk.

He dan siamthar Sagaing, Chin, Magway, Bago, Mon, Karen, Taninthayi leh Kayah biala township 77 a huam dawn a, heng hmunte sipai rorelna duh lohna lantir nasatna hmunte an ni. Heng hmunah hian sipai sorkar dodaltu, People's Defence Forces leh Myanmar sipaite hi an inbei fo a ni. Yangon leh Mandalay-ah chuan he dan hi hman a ni tawh a ni.

State of emergency thla 6 dang pawtsei

Myamnar sipai sorkar hian an ram inthlanpui buatsaih a tiam hnuah, Nilaini khan state of emergency chu thla ruk chhung a pawtsei leh. Hei vang hian August thlaa inthlan buatsaih a tum thu a lo sawi tawh chu sawnhlat a ngai leh dawn a ni.

Sipai hotu lu ber, general Min Aung Hlaing-a'n state of emergency pawtsei leh tura a ngenna chu national defence and security council chu remtiin, February 1 aṭanga chhiarin thla ruk dang atan pawhsei leh a ni tih acting president Myint Swe chuan a sawi.

Civil sorkar thuneihna an hneh­chhuh hnua sipaiten state of emer­gency an puan hi January thla a tawp tur a ni a, mi tam takin Nilaini khan sipai sorkar chuan inthlanpui neih hun tur a puan nghal an beisei laiin, emergency pawhsei a nih thu hi an rawn puang leh ta zawk a ni.

US chuan state of emergency pawhsei a ni chu na takin a sawisel nghal a, hei hi sipaiten dik lo taka ro an rel chhunzawmna leh, an ram mipuite tawrhna an thlen pawhseina a ni, tiin state deparmtent thupuangtu Ned Price chuan a sawi.

Local monitoring group-in a tarlan danin, Myanmar sipaiten thuneihna an chan hnuah, sipai sorkar duh lohna lantirtu mi 2,900 chuang an that tawh a, mi 18,000 chuang man an ni tawh bawk a ni.