US-ah Chinese spy balloon a thlawk lut
Pentagon chuan US ram chhungah Chinese spy balloon thlawk tur an hmuh thu Ningani khan a sawi.
Defence official chuan president Joe Biden-a'n ngenna a siam angin, defence secretary Lloyd Austin leh military official-te chuan balloon kahthlak chungchang hi an ngaihtuah nghal a, mahse mipuite dinhmun a tihderthawn theih dawn avangin kahthlak loh an rel ta zawk niin a tarlang. He balloon hi thil enfiah leh zirchiang tura tirh nia a lan thu a sawi bawk. China hian a hmain US-ah surveillance balloon hi a lo tir tawh bawk a ni.
Chinese balloon hi US hmarthlang lam, airbase leh underground siloa nuclear missile dahna bial lamah a thlawk hmuh a ni. Pentagon chuan thil hlauthawnawm takah erawh a ngai lo a, mahse China official-te chu hemi chungchang hi an hriattir tawh thu leh, US ram leh mipuite venhimna turin a ṭul apiang an ti dawn tih pawh chiang taka an hrilh nghalh thu an sawi.
Hetih lai hian US secretary of state Antony Blinken chu kar leh lam hian China ramah zin a tum. Hei hi nikum November thlaa ram pahnih hruaitu, Biden leh Xi Jinping-ten an lo sawidun tawh a ni a, mahse spy balloon hian Blinken zin turah nghawng a nei dawn em tih erawh hriat a la ni lo. Republican senator Tom Cotton chuan Blinken hi China rama a zin tur hi ṭhulh turin a ngen.