Pakistan President hlui Pervez Musharraf a thi

Pakistan army chief hlui leh president hlui, Pervez Musharraf chu hun rei tak a dam loh hnuah, kum 79 mi niin Pathianni khan Dubai-ah a thi.

Kum 1991-2008 chhunga Pakistan ram hotu a nih lai khan Pervez Musharraf hian thah tuma beihna ṭum eng emaw zat a pumpelh a ni. Kum 2008 inthlanpuiah a chak zo lo a, a hnu thla rukah an ram a chhuahsan zui a ni. Kum 2013 inthlanpuiah chuh leh tumin an ramah a kir a, mahse Pakistan a thlen hian man niin inthlanah a chuh phalsak a ni lo. Thubuai hrang hrang siamsak a ni a, heng a thubuai zinga pakhat, ram phatsantua puhnaah thiam loh chantir a ni zui bawk. Hei bakah hian PM hlui Benazir Bhutto thahna leh, Red Mosque cleric thah chungchangah pawh thubuai siamsak a ni bawk.

Kum 2016 khan a hriselna ṭhat tawk loh avangin Dubai-ah inenkawl turin a kal a, a awm zui nghal a ni. Amyloidosis natna neiin, a taksa peng hrang hrangte a ṭha lo a, hun rei tak damdawi-ina enkawl a nih hnuah nimin zing khan a thi ta a ni.

Pakistan President 10-na, Musharraf hian kum 1999 khan sipai chaknain prime minister Nawaz Sharif kaihhruai sorkar paihthlain Sharif hi a man a, Pakistan chief executive-in a awm a, a hnu kum 2001 aṭang khan President a ni zui a ni.

Kum 2007-a Pakistan chief justice Iftikhar Muhammad Chaudhry a ban leh a, ahnua lawyer eng emaw zat a ban zui avangin mipuiten duh lohna lantirin, tualchhung buaina a thleng zui a ni. Musharraf thupeka sipaiten nawrh huaihawtte an beihnaah mi 100 chuang an thi a ni. Tualchhung buaina zual zel vangin hemi kum November thla hian state of emergency puangin, an ram danpui a titawp zui bawk.

Dubai-a a tlanchhiat hnu, kum 2019 khan Pakistan special court chuan kum 2007-a emer­gency a puan chungchang­ah thi turin a chungthu a relsak a, mahse Musharraf chuan kum 2020 January thla khan a hremna hi khing letin, Lahore High Court chuan thi tura hremna pek hi a hnawl leh a ni.

Musharraf-a chhungte chuan Dubai-a Pakistan con­sulate-ah Musharraf-a ruang hi Pakistan rama phurh haw an dil a, an dilna hi phalsakin vawiin hian UAE aṭangin special flight hmangin phurh haw a ni ang.