US-in China airship a kahthlak sak

US chuan an ram chhunga sipai hmun pawimawhte enthlatu nia a puh, China spy balloon chu Antlantic chungah a kahthlak sak.

Department chu defence chuan China airship hi F-22 jet fighter-in missile, AIM-9X Sidewinde hmangin Inrinni khan Atlantic tuipuiah a kapthla tih a sawi. Airship kahchhiah them hi South Carolina-a Myrtle Beach hnaih tak, tuipui meter 14 vela thukah a tla a ni, an ti. Airship them hi tuipuiah hian mel sarih velah a darh a, hengte hi navy lawnglian pahnih hmangin zawn khawm mek a ni tih an sawi bawk.

China spy balloon nia sawi hi kar liam ta Ningani aṭang khan US ram chinah a thlawk hi hmuh a ni tawh a, president Joe Biden chu he balloon kahthlak tir tura nawrna nasa tak awm mah se, kahthlak hi lei lama awm mipuite tan a him loh hlauhthawnna avangin thu pek tih­chhuah a ni mai lo. Mahse a hnuah President chuan thupek tichhuakin, Inrinni khan hlawhtling takin kahhthlak a ni ta tih a sawi. China balloon hmuh a nih avang hian US secretary of state Antony Blinken-a'n China ram a tlawh tum pawh a ṭhulh phah a ni.

Hetih lai hian China chuan spy balloon a nih loh thu sawiin, weather balloon zawk a ni a, US ram chinah hian thliin a chhem lut zawk niin a sawi ve thung. US thiltih danah a lawm lo hle a, a ṭul angin chhanna pawh an la pe maithei tih a sawi.

Pentagon official-te sawi danin, China balloon hi January 28 khan Alaska chung, US ram chinah a lut tawh a, heta ṭang hian Canada ramah thlawk lutin, kar liam ta Ningani khan US ramah a rawn thlawk kir leh a ni. Tun ṭum hi a thlen vawi khatna a ni lo a, mahse tun ṭum anga rei hi an ram chhungah a awm ngai lo niin an sawi.