Turkey leh Syria-ah Magnitude 7.8-a na in lir a nghing

Turkey ram chhimchhak lam leh, Syria hmar lamah nimin zing khan magnitude 7.8-a nain lir a nghing a, hriat theih chinah nimin tlai thleng khan ram pahnihah hian mi 641 an thi tawh.

Lirnghing hi minute khat dawna rei nia sawi a ni a, in tam tak a chim a, in chim hnuaia tangte zawn leh chhanchhuah hna ngawrh taka thawh a ni. Thi zat pawh hi an la pun chhoh rin a ni bawk.

Lir nghin hun hi GMT-ah zing dar 4:17 niin, a nghin ṭanna hi Turkey-a Gaziantep province khawpui aṭanga km 33 vela hla, Kahramanmaras hmunah a ni. Syria border aṭanga km 50 vel a ni. Epicentre aṭanga km 460-a hla, Turkey khawpui Ankara-ah lirnghing hian a sàwi pha a ni. He bialah hian mi maktaduai hnih vel an cheng a, an zingah hian Syria mi, an ram tualchhung indona tlan­chhiatsan mi tam tak an awm.

Magnitude 7.8-a naa lir a nghing hnuah aftershock ṭum 40 chuang a thleng bawk a, magnitude 6.7-a na pawh a tel.

Turkey disaster and emer­gency management agency chuan lirnghingin an rama chhiatna a thlenNa hi 300 chuang an tling tawh tih sawiin, mi 2,000 chuangin hliam an tuar bawk. Building 1,719 chu lirnghing hian a sawi chim bawk a ni. Turkey sorkar chuan lirnghinna bial, province pariatah emergency a puang nghal bawk.

Syria ramah pawh lirnghing vanga thi hi 300 an chuang a, hliam tuar 700 dawn an awm bawk. Lirnghing vanga thite hi Aleppo, Hama, Latakia leh Tartous province-a mite an ni.

Ram hrang hrang chuan Turkey leh Syria rama chhiatna thleng chu pawi an tih thu leh, a ṭul anga puih an inhuam thu an sawi a, ram eng emaw zatin ṭanpuina an thawn nghal bawk.

Turkey sorkar ngenna angin nimin khan Israel chuan chhanchhuahna thawktu tur leh, damdawi mamawhte a thawn nghal a ni. Netherlands pawhin Turkey leh Syria-ah rescue team an tir dawn tih a sawi. Russia president Vladimir Putin pawhin ram pahnihte chu puih an inhuam thu a hrilh bawk a ni.