Ukraine President that lo turin Putin a intiam

Israel prime minister hlui Naftali Bennett chuan Russia president Vladimir Putin hnen aṭangin, Ukraine president Volodymyr Zelenskyy that lo tura intiamna a dawn thu a sawi.

Nikum February thlaa Russia-in Ukraine ram a run hnuah, March thla khan Bennett hi Russia-ah zinin, Putin nen an inhmu a ni. Ram pahnihte indo hnuah Russia President meeting neihpui thei ram hruaitu tlemte zingah a tel.

Russia President nena an inkawmna chungchang Bennett-a'n a sawina hi kar liam ta Inrinni khan tihchhuah a ni. Bennett chuan Putin-a hnena Ukraine President thah a tum em tih a zawhna chu , "Zelenskyy hi ka that dawn lo," tia a intiam thu a sawi. An meeting zawh hnuah Zelenskyy pawh be nghalin, Putin-a intiamna hi a hrilh thu a sawi.

Ukraine foreign minister Dmytro Kuleba chuan Putin-a intiamna chu an awih loh thu a sawi ve nghal thung. Kuleba chuan, "Tun hma pawhin Putin chuan Crimea luah loh tur te, Minsk agreement bawhchhe lo tur te, Ukraine run lo turtein a lo intiam tawh a, mahse a intiamna hi a bawhchhe vek a ni. Thil ti lo tura a intiam apiangin, a intiamna letling chiahin a che ziah ṭhin," a ti.

Ukraine Defence Minister thlak dawn

Russia nena an indo mek karah, Ukraine chuan an ram defence minister Oleksii Reznikov a thlak dawn.

Defence minister Renzikov hi a ministry-a eirukna thlen chungchang avangin thlak a ni dawn nia sawi a ni a, a aiah hian military intelligence hotu, kum 37 mi Kyrylo Budanov dah a ni ang. Reznikov hi strategic industries minister atan dah tum a ni thung.

Kum 2021 November thlaa defence minister atana ruat, Reznikov hi Russia nena an indo meknaah an ram tana hma la tur langsar tak niin, Ukraine sipaite tana khawthlang ramte ralthuam lakluhna kawngah theihtawp a chhuah a ni. Mahse a ministry-in food contract dik tawk loa an ziah nia puh a nih avangin, January thla tawp lam khan a deputy pawh bantir a lo ni tawh bawk.