Turkey leh Syria-ah lirnghing vanga thi 5,000 an chuang tawh

Turkey leh Syria ramah Thawhṭanni zinga magnitude 7.8-a naa lirnghingin chhiatna a thlena thi chu mi 5,000 an chuang tawh. Lirnghing tuarte chhanchhuah hna hi thawh chhun­zawm zel a ni.

Turkey vice president Faut Oktay chuan an ram bikah lirnghing vanga thi hi mi 3,419 an tling tawh a, hliam tuar mi 20,534 an awm bawk niin nimin khan a sawi. Lirnghinna bialah ruahsur leh khaw vawtin chhanchhuah hna thawh pawh a tibahlah a, hei bakah hian lirnghinna biala inbiakpawhna te a chhiat avangin ṭanpui hna thawhna kawngah pawh duh angin hma an la chak thei lo. Lirnghing tuar nasa zual province pathum - Hatay, Kahramanmaras leh Adiyaman-te chuan chhanchhuah hna leh chhawmdawl hna thawktu motor-te chauh luh phalsak an ni, a ti.

Syria ramah pawh lirnghing vang hian mi 1,600 chuang an thi tawh a, hliam tuar 3,500 vel an awm bawk a ni. Ram pahnihah hian chhiatna thleng vanga thi hi an la pun chhoh rin a ni bawk.

Turkey president Recep Tayyop Erdogan chuan chhiatna thleng vanga thite chu ram pumah ni sarih sun an ni dawn tih a puang. Syria pawhin United Nations-ah puihna a dil bawk a ni.

US Geological Survey-in a chhin­chhiah danin, Thawhṭannia lirnghing kha kum 2021, August thla hnua South Atlantic-a lirnghing na ber a ni.

Ṭanpui turin ram hrang hrang thawk chhuak

Lirnghing vanga chhiatna nasa tak an tawh hnuah Turkey leh Syria ram chuan ram dangte ṭanpuina an ngen a, ram hrang hrangin an puih tur thu an sawi bakah, ram eng emaw zat chuan puitu tur hi an tir lut tawh.

European Union chuan search and rescue team tirin, emergency mapping service atana hman turin Copernicus satellite system pawh a tinung nghal bawk. EU hnuaia ram 13-te chuan lirnghing tuar ramte hi an puih tur thu an sawi.

US chuan NATO member Turkey pui turin firefighter leh structural engineer 100 bakah uifing-te a tir. US sponsored humanitarian partner-te pawhin Syria ram puitu tur an tir bawk a ni.

Pakistan chuan rescue team bakah chhawmdawlna hmanruate Turkey ramah a thawn tawh a, Russia pawhin chhanchhuah hna thawktute pui turin Syria ramah sipai unit 10 a tir tawh a, Turkey pawh puih a tum tih a sawi bawk.

Jordan chuan Turkey leh Syria tan chhawmdawlna thawnin, Egypt pawhin Turkey ram puih a tum tih a sawi. Lebanon chuan Turkey-ah Red Cross leh civil defence first responder leh firefighter a tir bawk a ni.

Israel chuan Turkey-ah engineer, medical lam leh chhawmdawl hna thawktu 150 awmna search and rescue team a tir. Syria ram tan pawh chhawmdawlna an pek tur thu an sawi.

South Korea chuan Turkey-ah search and recue team a tirh bakah, damdawi tam tham tak a thawn bawk.

Britain chuan search-and-rescue specialist 76 chu hmanraw ṭha leh ui fing nen Turkey ramah a tir a, medical team an kal tel bawk. Syria rama lirnghing tuarte ṭanpui dan tur pawh UN nen an sawidun mek.

India chuan Turkey-ah natural disaster response force aṭangin rescue team a tir a, ui fing bakah chhawm­dawlna hmanruate a thawn bawk. Medical team pawh tirh leh a tum bawk.