Turkey-Syria : Lirnghing vanga thi zat pun belh zel

Turkey leh Syria rama lir nghing vanga thi zat an pun belh zel a, nimin thleng khan ram pahnihah hian chhiatna rapthlak thleng vanga thi zat hi mi 9,500 chuang an awm tawh.

Chhanchhuah hna thawktute chuan in chim hnuaia tang bakah, chin hriat loha awm mi eng emaw zat an la awm avangin thi zat hi an la punchhoh zel a rinawm thu an sawi. Syria ram hmun ṭhenkhatah chuan hmanruate a awm loh avangin in chimin a delhte chhanchhuah hna thawkin, kut lawngin in chimte hi an thianfai a ni. World Health Organisation (WHO) official-te chuan ram pahniha chhiatna thlenga thi zat hi 20,000 vel an tlin chhoh a rinawm thu an sawi.

Turkey ramah lirnghing vanga thi hi mi 7,100 an tling tawh a, Syria ramah mi 2,500 vel an tling tawh bawk nia sawi a ni. Turkey president Tayyip Erdogan chuan nimin khan lirnghinna hmun ṭhenkhatte a tlawh.

Turkey ram thuneitute chuan lirnghing hian km 450 vela zaua cheng, mi maktaduai 13.5 vel a nghawng tih an sawi a, Syria ramah pawh epicentre aṭanga km 100-a hla, Hamas-a chengte pawh chhiatna thleng vanga thi an awm.

Syrian Red Crescent chuan an ramin chhiatna a tawh mekah, khawthlang ramte chu pui tura ngenin, an ram hrekna an siam mekte pawh hlip turin a ngen. Khawthlang ramten Syria president Bashar al-Assad kaihhruai sorkar hrekna an siam avang hian chhawmdawlna pekna kawngah pawh harsatna a siam phah a ni.