Myanmar leh Russia-in nuclear power tihmasawnna tur inremna an ziak
Myanmar-a sipai sorkar leh Russia -a atomic energy company chuan Myanmar rama energy lam indaihlohna phuhrukna kawng khat atan, nuclear power siamna tur inremna an ziak. Hemi kawnga hmalakna atan Myanmar-ah nuclear power information centre an hawng bawk.
Myanmar state media-in a tarlan danin, Thawhlehni khan sipai sorkara hotu lu ber, senior general Min Aung Hlaing chuan Russian State Atomic Energy Corp, Rosatom-a general director Alexey Evgenievich Likhachev a hmu. Hruiatu pahnihte hi Yangon khawpuia an hawn thar, Nuclear Technology Information Center-ah an inhmu a ni.
Kum 2015-a inremna hmasa an lo ziah tawh hnuaiah, Myanmar hian Rosatom puihnain nuclear reactor siam leh hman theih hi a tum a ni. Gen Min Aung Hlaing chuan, "Rosatom zawrah Myanmar chuan Small Modular Reactor siam leh enkawlna kawngah hma a la thei dawn a, qualified expert-te pawh a chherchhuak thei dawn a ni," a ti. Meeting-ah hian health leh agricultural sector lamah nuclear energy ṭangkainate bakah, electricity siamchhuah leh a ṭha zawnga nuclear energy hmanna tura thawhdun dante pawh an sawi bawk.
Kum 2021-a sipai chakna hmanga Myanmar civil sorkar thuneihna hnehchhuh a, sipaiten ro an rel hnuah khawthlang ramte chuan sipai sorkar hi pawm loin, hrekna hrang hrangte an siam zui a ni. Hetih lai hian Russia erawh chuan Myanmar ram nena an inṭhianṭhatna hi a la vawng chhunzawm zel a ni.
Russia hian tun hnaiah Southeast Asia ram dang - Vietnam, Indonesia leh Philippines-te pawh nuclear power lama thawhdunna a lo siampui tawh bawk a ni.