NKorea-in military parade-ah a missile neihte a pholang

North Korea chuan Nilaini zanah military parade a buatsaih a, a missile neih hrang hrangte pholangin heng zingah hian intercontinental ballistic missiles (ICBMs) eng emaw zat an tel.

NKorea ram hotu lu ber, Kim Jong-un chuan nighttime parade hi a fanu Kim Ju-ae nen an lo thlir a ni. Kim Ju-ae hi kum 10 mi vel nia sawi a ni. Parade neih hmaa sipai hotute nena hun hmanah pawh a, a nu leh pa bulah a tel ve a ni. Kim Jong-un leh a nupui, Ri Sol Ju-te hian fa pathum neiin, a upa ber mipa a ni a, Kim Ju-ae hi a milai niin, a nau hmeichhia a awm nia sawi a ni.

Parade hi North Korean army din champha vawi 75-na puala neih niin, long-range missile eng emaw zat a pholan hian sawizui a hlawh nghal hle a, NKorea-in US defence system a chona leh, invenna hmanrua a neih ṭhat tawk zia a tarlanna pakhat nia ngaih a ni. Missile pholan tam zawk hi US ram laili kap pha vek niin an sawi.

Nimin khan North Korean media chuan military parade thlalakte hi tichhuakin, Pyongyang central square-a ICBM 10 chuang pholan laite an tilang. Mahse an ralthuam pholante chanchin kimchang erawh a tarlang tel lo. Analyst ṭhenkhat chuan ralthuam pho lan zingah hian ICBM thar, solid-fuel missile pawh a tel niin an sawi. Solid-fuel missile-te hi liquid-fuel missile aiin an kapchhuak rang thei a, a lo ven pawh a harsa zawk a ni. Mahse NKorea sorkar hian long-range solid-fuel missile a enchhin tawhah a la hlawhtling lo.

Nilaini zana hlan zingah hian NKorea ICBM lian ber, Hwasong-17 pawh 11 lai a tel a, heng missile-te hian nuclear ralthuam phur thei leh, khawvel khawi hmun pawh kap pha thei nia sawi an ni. Nikum khan Hwasong-17 hi an lo enchhin tawh a ni.