Turkey-Syria : Lirnghing vanga thi 16,000 an tling tawh

Turkey leh Syria rama lirnghingin chhiatna nasa tak a thlen vanga thi an pung zel a, nimin thleng khan ram pahniha thi zat hi 16,000 an tling tawh.

Lirnghingin chhiatna a thlenna hmuna mi tam tak chu khawvawt tak hnuaiah awmna mumal nei loin, tui thianghlim leh electric supply nei loin an la awm. Heng mite chungah chhiatna thuahhnihna a thlen leh mek a ni tiin World Health Organisation (WHO) chuan a sawi a, khawvawtin a hmeh bakah ei leh in mumal neih loh vanga thi an awm chhoh a hlauhthawnawm thu a sawi. Turkey-a lirnghinna bial ṭhenkhat chuan khaw vawh lam hi minus 5 degree Celsius te a ni.

Official-ten an tarlan danin, lirnghing vang hian Turkey ramah mi 12,873 an thi a, Syria-ah 3,162 an thi tawh bawk.

United Nations aid convoy chuan nimin khan Turkey aṭangin Syria ram a thleng. Truck parukte hi UN Security Council-in Syria-a chhawmdawlna petu turte tana ramri kaltlang a phalna awmchhun, Bab al-Hawa an thleng tawh a ni.

Turkey president Recep Tayyip Erdogan chuan Nilaini khan an ram lirnghinna hmun ṭhenkhat a tlawh a, lirnghing tuartu chhungtinte chu Turkish lira 10,000 (USD 530) ṭheuh pek an nih tur thu leh, lirnghingin province 10-a chenna in a tihchhiate chu kum khat chhunga sak ṭhat leh vek an nih tur thu a sawi.

UN agency chuan Thawhṭannia magnidute 7.8-a naa lir a nghin hnuah khan, aftershock ṭum 648 vel a thleng tawh niin a tarlang. Lir nghing nawn leh ṭhin hian chhanchhuah hna leh chhawmdawl hna thawh thleng pawhin a tibahhlah phah niin a sawi.