Australia-in sorkar building-a China siam camera hman la thla vek dawn

Australia sorkar chuan sorkar building-a China siam security camera hmante a him tawk leh tawk loh enfiahin a la thla vek dawn tih defence minister Richard Marles chuan a sawi. United States leh Britain chuan nikum khan sorkar department-te chu hmun pawimawh bikah China siam camera hmang lo turin an lo ti tawh bawk.

Britain chuan China company-te chuan ram security service hnenah data leh information-te pe vek tura nawr luih an nih palh hlauhthawn thilah, nikum November thla khan China siam security camera-te chu sorkar hmun pawimawhah hmang lo turin a lo ti tawh a ni.

Australia hian sorkar building 200 chuangah China siam security camera hi a dah a ni. Defence minister Marls chuan heng camera zawng zawng hi lakthlak vek an ni dawn tih sawiin, enfiah vek an ni ang, a ti. "Kan hmun pawimawhte hi an him ngei tih fiahna atan hetianga enfiah vek hi a ṭul a ni," tiin a sawi. Security camera an hmangte hi Hikvision leh Dahua company siamte an ni a, heng company pahnihte hi US chuan blacklist-ah a lo dah ve ve tawh.

Nikum November thla khan US chuan Hikvision leh Dahua company-te siam surveillance equipment chu an ram security tan a him lo thei a ni tiin, an rama lakluh a lo khap tawh a ni.